شارپرێس:

وەزارەتی کارو کاروباری کۆمەڵایەتی هەرێم لەڕونکردنەوەیەکدا دەڵێت، کەسانێکی نەناسراو بەناوی وەزارەتەکەوە پەیوەندی بە کەسانی نەخۆش و خاوەن پێداویستی تایبەت دەکەن و بەناوی دابینکردنی موچەوە داوای کارتی مۆبایل و پارەیان لێدەکەن.

وەزارەتی کارو کاروباری کۆمەڵایەتی ئاماژەی بەوەکرد،" ماوەی چەند رۆژێكە ژمارەیەكی نەناسراو بەناوی چاودێری كۆمەڵایەتی و وەزارەتمانەوە پەیوەندی بەخانەوادەی خاوەن پێداویستی تایبەتەكان دەكات بەمەبەستی دابینكردنی موچەی كەمئەندامی و موچەی چاودێری كۆمەڵایەتی و داوای ناردنی كارتی نیشتیمانی و زانیاری و پێدانی ژمارە و ناوی خەڵكی تر دەکەن، كە خاوەن پێداویستی تایبەت یان نەخۆش یان كەسانی بەساڵاچویان هەبێت ".

ئەوەشیخستەڕوو،" دواتر ئەو کەسانە پەیوەندی بەو خانەوادانە دەكەن و داوای كارتی مۆبایل دەکەن، كە بەداخەوە ژمارەیەك هاوڵاتی زەرەرمەندی ئەم فێڵكردنە بونەتەوە ".

وەزارەتی کارو کاروباری کۆمەڵایەتی لەڕونکردنەوەکەیدا دەڵێت،" لێرەوە بە هەمولایەك رادەگەینین كە وەزارەتمان ئاگاداری ئەم بابەتە نیە و ئەمە بەشێكە لە فێڵكردن و وەزارەتمان لەكاتی پێویست لەڕێگا فەرمییەكانەوە خزمەتگوزاری و ئاگادارییەكانی بڵاودەكاتەوە، بەرامبەر بەم فێلكردنەی ئەم گروپانەش رێكاری یاسایی دەگرینەبەر ".

محەمەد سەردار