شارپرێس:

دەستەی دەستپاکیی عێراق ڕایگەیاند، عێراق بەفەرمی چوە ناو ڕابیتەی نێودەوڵەتی دەزگاکانی دژە گەندەڵیی، ئەمەش پاش واژۆکردنی داواکاریی ئەندامێتیی‌و پێشکەشکردنی بۆ سکرتاریەتی ڕابیتەکە.

دەستەکە لەبەیاننامەیەکدا ئاماژەی بەوەکردوە، ڕابیتەکە پێشوازیی لەئەندامێتی عێراق کردوەو داوای کۆبونەوەیەکی ئەلیکترۆنی لەگەڵ سکرتێری گشتیی کردوە بۆ تاووتوێکردنی پێداویستییەکانی دەستەی دەستپاکیی‌و ئاڵوگۆڕکردنی ئەزمونەکان.

ئەم رابیتەیە لەساڵی 2006 دامەزراوەو 180 دەزگای دژە گەندەڵی لەخۆدەگرێت کە 16یان دەزگای عەرەبین.

ئامانجی ئەم ڕابیتەیە پاڵپشتیکردنی ئەو دەزگایانەی کە لەبواری دژە گەندەڵی کاردەکەن، هەروەک جێبەجێکردنی پەیماننامەی نەتەوەیەکگرتوەکان دژی گەندەڵی، بەشداریکردن لەبەدیهێنانی ئامانجەکانی گەشەپێدانی بەردەوام، کەمکردنەوەی بەرتیلدان‌و ئاسانکاریی بۆ ئاڵوگۆڕی ئەزمون‌و باشترین کارو کردارەکانە.

لەڕاگەیەندراوەکەدا ئاماژە بەوەشکراوە، ڕابیتەی نێودەوڵەتیی دژە گەندەڵیی ساڵانە کۆنفرانس‌و وۆرکشۆپی لەوڵاتانی وەک نەمسا، چین‌و قەتەر ڕێکدەخات، جگە لەپڕۆگرامەکانی ڕاهێنان بەئامانجی بەهێزکردنی هاوکاریی نێودەوڵەتیی‌و یەکخستنی هەوڵەکان لەشەڕی جیهانی دژی گەندەڵی.