شارپرێس:

سوپای ئیسرائیل ڕایگەیاند، فەرماندەیەکی باڵای سوپای پاسدارانی ئێرانیان کوشتوە، کە لە یەکەی موشەکە بالیستییەکانی حزبوڵا کاری کردوە.

بەپێی ڕاگەیەندراوی سوپا، ئەبوزەر محەمەدی کەسایەتییەکی ناوەندی بووە لە هەماهەنگی سەربازی نێوان حزبوڵا و ئێران و وەک ئەڵقەی پەیوەندیی و نێوەندکار لەگەڵ بەرپرسە باڵاکانی تاران کاری کردوە.

سوپای ئیسرائیل دەڵێت، ناوبراو ڕۆڵێکی سەرەکی و کاریگەری هەبوە لە بونیادنانی هێزی سەربازیی حزبوڵا لە بواری موشەکیی و چەکە ستراتیژییەکاندا.

هەروەها لە چوارچێوەی پۆستەکەیدا سەرپەرشتیی پلاندانان و جێبەجێکردنی ئۆپەراسیۆنەکانی کردوە و ڕاوێژکاری و ئاراستەکردنی بۆ هەڵدانی مووشەکەکان بەرەو ئیسرائیل ئەنجام داوە، کە وەک سەرچاوەیەکی زانیاری گرنگ و خاوەن کاریگەرییەکی زۆر لە یەکەی مووشەکیی حزبوڵا هەژمار دەکرایەوە لەم ماوەیەی دواییدا.

ئاکۆ عەبدوڵڵا ئاڵی