شارپرێس:

داهاتی نانەوتیی سنوری پارێزگاکانی سلێمانی، هەڵەبجەو هەردوو ئیدارەی سەربەخۆی ڕاپەڕین‌و گەرمیان لەم هەفتەیەدا ڕوبەڕوی پاشەکشەیەکی بەرچاو بوەتەوە، بەگوێرەی دوایین ئامارەکانی ماڵپەڕی شەفافییەت بۆ چاودێریی‌و ڕێکخستنی داهاتەکان، کۆی داهاتی نانەوتیی ناوچەکە لەماوەی نێوان 5ی ئەیلوول تا 11ی ئەیلولی 2026، تەنها 10 ملیارو 750 ملیۆن‌و 779 هەزار دینار بوە.

ئەم داتایە داراییە نوێیە نیشانیدەدات کە داهاتی گشتیی ناوچەکە لەچاو هەفتەی پێشوتردا بەبڕی 10 ملیارو 316 ملیۆن دینار دابەزیوە، ئەمەش هاوتایە لەگەڵ کەمبونەوەی ڕێژەیی بەقەبارەی 10.91٪.

ئەم دابەزینە کتوپڕە لەکاتێکدادێت کە بازاڕو جومگەکانی ئاڵوگۆڕی بازرگانیی ناوچەکە لەژێر کاریگەریی گۆڕانکارییە ئابورییەکاندا دەژین.

سەبارەت بەشێوازی کۆکردنەوەو پێکهاتەی ئەو داهاتە داراییەش، داتاکانی ماڵپەڕی شەفافییەت ئاشکرایدەکەن کە پشکی شێرو زۆرینەی ڕەهای داهاتەکە کە دەکاتە 89٪ بەشێوەی نەختینە (کاش) وەرگیراوە. لەبەرامبەردا، تەنها 11٪ی داهاتەکە بەشێوەی چەکی بانکی تۆمارکراوە، لەکاتێکدا جۆری مامەڵەی مەقاسە لەسەرجەم گەنجینەو فەرمانگەکانی سنورەکەدا تەواو سفر بوە.

شارەزایانی ئابوریی پێیانوایە، ئەمجۆرە هەمەجۆریی‌و هەڵبەزو دابەزینە لەژمارەکاندا، ڕاستەوخۆ بەستراوەتەوە بەقەبارەی هاوردەکردن لەمەرزە سنورییەکان‌و ئاستی باج‌و ڕسوماتی کۆکراوە لەم ماوەیەدا کە پێویستی بەبەدواداچونی وردتر هەیە بۆ جێگیرکردنی سیستەمی دارایی ناوچەکە.