شارپرێس:

موزەفەر کامکار، هونەرمەندی مۆزیکژەنی رۆژهەڵاتی کوردستان لەتەمەنی 82 ساڵیدا کۆچی دواییکرد و لەگۆڕستانێکی شاری سنە بەخاکسپێردرا.

موزەفەر کامکار زیاتر لە 50  ساڵ خزمەتی بە هونەری کوردی کردوە و لەگەڵ هونەرمەندە دیارەکانی کورد ئامێرەکانی مۆزیک و بەتایبەت کلارینێتی ژەنیوە، لەوانەش، حەسەن زیرەک، فەتانە وەلیدی، بەهادین نەورۆزی، ئیرەج عەندلیبی و عەباس کەمەندی و ساڵانێک لە ڕادیۆی کرماشان، تەلەفزیۆنەکانی تاران و سنە کاری کردوە.

 ئەو هونەرمەندە لە ساڵی 1943 لە شاری سنەی ڕۆژهەڵاتی کوردستان لەدایکبووە، لە تەمەنی 18 ساڵییەوە دەستی بەکاری هونەری کردووە و لە ساڵانی شەستەکانەوە دەستیی کرد بە فێربوونی ژەنینی کلارینێت، دواتر پەیوەندی بە گرووپی موزیکی 28ـی کوردستانەوە کرد.

محەمەد سەردار