شارپرێس:
بەگوێرەی زانیارییەکانی سەرچاوە سورییەکان، کەسایەتییە نزیکەکانی ئەحمەد شەرع سەرۆکی سوریا، دەستیان بەلێکۆڵینەوە لەناوی کەسایەتییە سورییەکان کردوە بۆ پێکهێنانی حکومەتێکی نوێ لەو وڵاتە.
ئەو سەرچاوانە بەکەناڵی "سکای نیوز عەرەبی"یان ڕاگەیاندوە، ئاراستەی ئێستا جەخت لەسەر پێکهێنانی حکومەتێکی فراوانتر دەکاتەوە کە نوێنەرایەتییەکی بەرفراوانتری پێکهاتەو ناوچە جیاوازەکانی سوریای تێدابێت.
سەرچاوەکان پێشبینیدەکەن، هەنگاوی پێکهێنانی حکومەتێکی نوێ بەشێک بێت لەتێگەیشتنی فراوانتر لەگەڵ وڵاتە ڕۆژئاواییەکان.
لەکۆتایی مانگی ئاداری ڕابردوو، ئەحمەد شەرع پێکهێنانی حکومەتی سوریای لەوڵاتەکەدا ڕاگەیاند، کە 22 وەزیری لەخۆگرتبوو، ئەویش دوای ڕوخانی بەشار ئەسەد سەرۆکی پێشوو.
جێگه‌ی ئاماژەیە، بەشار ئەسەد لە 8ی کانونی یەکەمی 2024 ڕوخێنراو ئەحمەد شەرع لە29ی کانونی دوەمی 2025 بوو بەسەرۆکی کاتیی سوریا.
باسکردنی پێکهێنانی حکومەتێکی نوێ لەکاتێکدایە کە فشارە نێودەوڵەتییەکان بۆ ئەنجامدانی چاکسازییە سیاسییە گشتگیرەکان زیاد دەکەن، لەگەڵ قەیرانێکی ئابوریی خنکێنەرو ئاڵنگارییە ئەمنییە بەردەوامەکان لەچەند ناوچەیەکی وڵاتەکەدا.
