سوپای ئیسرائیل ڕۆژی پێنجشەممە ڕایگەیاند کە سێ لە سەرکردە دیارەکانی بزووتنەوەی حەماس لە غەززە لە ئۆپەراسیۆنێکی هەواڵگری سێ مانگ لەمەوبەر کوژراون.
سوپای ئیسرائیل لە بەیاننامەیەکدا ڕایگەیاندووە، ڕوحی موشتەها سەرۆکی حکومەتی حەماسە لە کەرتی غەززە، کە هاوکات دەستی ڕاستی یەحیا سینوار سەرۆکی بزووتنەوەی حەماسەو کوژراوە.
سوپای ئیسرائیل دەڵێت: وەزیری ئاسایشی ناو مەکتەبی سیاسی بزووتنەوەکە، سامح ئەلسەراج و سەرۆکی دەزگای ئاسایشی گشتی بزووتنەوەکە، سامی ئۆدەیان کوشتووە.
ڕوونیشیکردەوە، لەڕێگەی ئۆپەراسیۆنێکی هەواڵگرییەوە لەلایەن سوپای ئیسرائیلەوە بە هاوکاریی دەزگای ئاسایشی گشتی ئیسرائیل کە تیایدا فڕۆکە جەنگییەکانی هێزی ئاسمانی ئیسرائیل بەشداربوون ئەو سەرکردانە کوژراون لەحەشارگەیەک لە باکووری غەززە.