چالاکوانانی ڕوانگەی سووری بۆ مافەکانی مرۆڤ ڕایانگەیاند کە لە گەڕەکەکانی جەرمانا لەریفی دیمەشق ڕوداوی خوێناوی ڕوویانداوە.
هاوکات ژمارەی کوژراوان بۆ 12 کەس بەرزبووەتەوە کە شەشیان دانیشتووی شارەکەن و 15 کەسی دیکەش بریندارن.
هەروەها لەنێو کوژراوەکاندا شەش ئەندامی هێزەکانی حکومەتی سوریا هەن و پێشبینی دەکرێت بەهۆی سەختی برینەکانیشیانەوە ژمارەی کوژراوەکان بەرزببێتەوە.
لەئێوارەی ڕۆژی دووشەممەوە لە شاری جەرامانا پێکدادان لە نێوان گروپە چەکدارە ناوخۆییەکان و هێزی حکومەت ڕوویداوە.
ئەم پێشهاتانە دوای بڵاوبوونەوەی تۆمارێکی دەنگی کەسێکی کۆمەڵگەی دروز هات ، کە هێرشی کردبووە سەر ئیسلام و ئەمەش بووە هۆی دروستبوونی شەپۆلێکی ناڕەزایی جەماوەری و هاندانی تائیفی لە چەند پارێزگایەکی سوریا، بەتایبەتی لە شارەکانی حەلەب و حومس و دیمەشق.
لە کاتی پێکدادانەکەدا چەکی سوک و مامناوەند بەکارهێنرا، لەگەڵ تۆپباران لە گەڕەکی ئەلنەسیمەوە، کە چەند ناوچەیەکی نیشتەجێبوونیان کردە ئامانج. ئەمەش ترس و دڵەڕاوکێی لەنێو هاوڵاتیانی مەدەنیدا دروستکرد، لەکاتێکدا تا ئێستا هیچ ئاماژەیەکی ڕوون بۆ کەمکردنەوەی ئاستی خراپی دۆخەکە دەرنەکەوتووە، سەرەڕای چەندین جار بانگەوازی کەسایەتییە ناوخۆییەکان بۆ دوورکەوتنەوە لە پەرەسەندنی زیاتر.
