مه‌زڵوم عه‌بدى ژماره‌ى شه‌ڕڤانانى هه‌سه‌ده‌ ئاشكراده‌كات

کوردستان

29/07/2025‌ 30799 جار خوێندراوه‌ته‌وه

شارپرێس:

مەزڵوم عەبدی ئاشكرایده‌كات، دیمەشق ئامادەیی خۆی ڕاگەیاندوه‌ بۆ ڕازیبون بەداخوازییه‌كانى کورد، لەبارەی زمان‌و مافە کولتورییەكان، ده‌شڵێت:"یەکخستنی 100 هەزار چەکدار لەوەزارەتی بەرگریی سوریا پرۆسەیەكی گەورەیە، بەڵام لەگەڵ حکومەت هاوڕاین لەسەر یەکڕیزیی سوریا بەیەک سوپاو یەک ئاڵا، هەندێک دامەزراوەی سیادیش دەبێت بەناوەندگەرایی بمێننەوە".


ژەنەڕاڵ مەزڵوم عەبدی فەرماندەی گشتیی هێزەكانی سوریای دیموكرات (هه‌سه‌ده‌) لەچاوپێکەوتنێکیدا لەگەڵ كەناڵی (الحدپ) وتویه‌تى، "ئاگادارکراینەوە کۆبونەوەی پاریس لەسەر داوای دیمەشق بەهۆی ڕوداوەکانی سوه‌یدا دواخراوە، من بۆخۆم بەشداریی کۆبونەوەی پاریس دەکه‌م".

ده‌شڵێت:"دیمەشق ئامادەیی خۆی پێڕاگەیاندوین بۆ ڕازیبون بەداخوازیی کورد، لەبارەی زمان‌و مافە کولتورییەكان".

سه‌باره‌ت به‌ڕێککەوتنامەى 10ى ئادارى دیمەشقیش عه‌بدى ئاماژه‌ى به‌وه‌داوه‌، "جێبەجێکردنی ڕێککەوتنی 10ی ئادار بەهۆکاری پەیوەست بەئێمەو دیمەشق بەهێواشی بەرەوپێشدەچێت، ئێمە پابەندین بەڕێککەوتنه‌كه‌، بەڵام جێبەجێکردنه‌كه‌ى پێویستی بەکات هەیە".

فه‌رمانده‌ى گشتیى هه‌سه‌ده‌ باسى له‌وه‌شكردوه‌، ڕۆژانە لەڕێگەى کەناڵەکانی پەیوەندیی لەگەڵ حکومەتی سوریا گفتوگۆیان هەیەو خەریکى خولی نوێی گفتوگۆن لەگەڵ دیمەشق.

مه‌زڵوم عه‌بدى ڕایگه‌یاندوه‌، "یەکخستنی 100 هەزار چەکدار لەوەزارەتی بەرگریی سوریا پرۆسەیەكی گەورەیە، بەڵام لەگەڵ حکومەت هاوڕاین لەسەر یەکڕیزیی سوریا بەیەک سوپاو یەک ئاڵا، هەندێک دامەزراوەی سیادی دەبێت بەناوەندگەرایی بمێننەوە".

جەختىکردەوە، "ئەوان داواى ئەوەیانکردوە زمانی کوردی شانبەشانی زمانی عەرەبی زمانی فەرمی بێت لەناوچە کوردنشینەکان، بەفەرمی داوامان لەدیمەشق كردوە بۆ گەڕانەوەی دامودەزگاکانی حکومەت، بۆ شارەكانی ڕەققەو حەسەکەو دێرەزور، نایشارینه‌وه‌ ئێمه‌ بەشێک دەبین لەوەزارەتی بەرگریی سوریا".

سەبارەت بەڕۆڵى وڵاتانیش عه‌بدى ده‌ڵێت:"سعودیە دەتوانێت ڕۆڵێکی ئەرێنی ببینێت ئەگەر وەک ناوبژیوانێک لەدانوستانەکانمان لەگەڵ دیمەشقدا، هەوڵدەدەین ئاگربەست لەباکوری ڕۆژهەڵاتی سوریا بگۆڕین بۆ ئاشتییەکی گشتگیر، تاکە بژاردەی ئێمە لەگەڵ دیمەشق گفتوگۆیە، دیدارەکەم لەگەڵ سەرۆک شەرع ئەرێنی بوو، دوای سێ کاتژمێر گفتوگۆ، توانیمان بگەینە ڕێککەوتن".