دەزگای ستاندەر پێشوازی لە هەنگاوە نوێیەكانی ڕێكخەری گشتی گۆڕان بەئاڕاستەی دوركەوتنەوە لەبەرەی دەسەڵات دەكات.
دەزگای ستاندەر لە راگەیەندراوێكدا دەڵێت، دوای بڕیارە نوێیەكانی بزوتنەوەی گۆڕان بە دوركەوتنەوە لە بەرەی دەسەڵات و هەوڵەكانیان بۆ نزیكبوونەوە لەبەرەی خەڵك كە شوێنی ڕاستەقینەی بزووتنەوەكەیە، ئێمە پشتیوانی ئەو هەنگاوە دەكەین و لەو داوای لێبوردنەی كە گۆڕان لەخەڵكی كوردستانی كرد تێدەگەین و بەرزی دەنرخێنین، ئێمە چاوەڕێی هەنگاوی گەورەتری لێ دەكەین لە درووستكردنی برایەتی و تەبایی و یەكخستنەوەی ڕیزەكانی بزوتنەوەكە، و كشانەوەیان لەحكومەت و زیاتر دووركەوتنەوە لە دەسەڵات و گەڕانەوەی ریزی ئۆپۆزسیۆن و میللەت.
لەوبارەوە مەسعود عەبدولخالق بەشارپرێسی راگەیاند، هەنگاوەكانی ئیستای بزووتنەوەی گۆڕان جێگەی دەستخۆشییەو ئیمە پشتیوانی دەكەین و داواش دەكەین شانسێكی تر بدرێت بە گۆڕان تا بەم ئاراستەیە بتوانێت ببێتە چەتری كۆكەرەوەی بەرەی ئۆپۆزیسۆن و كیشەكانی ناوخۆی خۆشیان بەئاشتیانە چارەسەر بكەن.
هەروەها مەسعود عەبدولخالق وتیشی، دوركەوتنەوەی گۆڕان لەدەسەڵاتی ئیستا مانای بەهێز بوونەوەی بزووتنەوەی گۆڕانە و ئەوەش بۆ هاوسەنگی هێز لەكوردستان گرنگە.
