شرۆڤەكارێكی سیاسی سوریا بۆردومانەكانی ئیسرائیل بۆ سەر دیمەشقی بە هەوڵێك لە تەلئەبیبەوە زانی كە تێیدا رێگری لە گەیشتنی هاوكاری بۆ حزبوڵڵا لە لوبنان دەكات.
ئیسرائیل بۆردومانی چەند ناوچەی سوریای کردووە هاوكات لەگەڵ هەڵكشانی هێرشی زەمینی و ئاسمانی لە لوبنان.
دكتۆر عەلی مەقسوود، شرۆڤەكاری سیاسی و سەربازی و شارەزای ستراتیژی لە دیمەشق، ڕایگەیاند، بۆردومانی دیمەشق لە درێژەی هێرشە ئاسمانییەكانی ڕابردووە بۆ سەر ناوچەكانی دیكە.
ئەو پێی وابوو كە ئامانجی ئەو هەڵمەتانە بڕین و لێدانی هێڵەكان و دەروازە وشكانییەكانی نێوان سوریا و لوبنان بووە، "بە ئامانجی بڕینی ڕێگای دیمەشق-بەیروت كە نزیكترینە لە باشووری لوبنان بۆ گەیاندنی هاوكاری بۆ حزبوڵڵا."