26 ساڵ بەسەر دەستگیرکردنی عەبدوڵڵا ئۆجەلان، رێبەری پارتی کرێکارانی کوردستان (پەکەکە) تێپەڕی. ئۆجەلان لەڕێگەی هەوڵێکی نێودەوڵەتی چەند دەزگایەکی هەواڵگری لە 15ی شوباتی 1999 لە نایرۆبی پایتەختی کینیا دەستگیرکرا و دواتر گەڕێندرایەوە بۆ تورکیا.
ئۆجەلان سەرەتا سزای لەسێدارەدانی لەلایەن دادگای تاوانەکانی تورکیاوە بۆ دەرکرا، بەڵام بەهۆی کاردانەوەی نێودەوڵەتی و ترسی تێکچوونی بارودۆخی نیوخۆی تورکیا، سزاکەی بۆ زیندانی هەتاهەتایی گۆڕدرا.
دوای مانەوەی 19 ساڵ لە سوریا، لە ساڵی 1998 حکومەتی سوریا بەهۆی فشارەکانی سەری لەلایەن تورکیاوە، داوای لە ئۆجەلان کرد ئەو وڵاتە جێبهێڵێت، ئەوەش بەهۆی پەرەسەندنی هێرشەکانی گەریلا بۆ سەر سوپای تورکیا و زیادبوونی چالاکی سیاسی پەکەکە لەنێوخۆی تورکیادا.
ئۆجەلان لە سوریا کەمپی مەشق و راهێنانی بۆ ئەندامانی پارتەکەی کردبووەوە و تێیدا رۆژانە وانەی سیاسی، سەربازی و فیکری دەگوترانەوە و دواتر دەنێردرانەوە بۆ باکووری کوردستان.
سووریا سەرەڕای ناکۆکییەکانی لەگەڵ تورکیا لەو کاتەدا، بەڵام تاوەکو دەهات فشارەکانی سەریشی زیاتر دەبوون، بۆیە داوای لە ئۆجەلان کرد ئەو وڵاتە جێبهڵێت. سەرەتا ئۆجەلان روویکردە روسیا، دواتر چووە ئەوروپا بە مەبەستی مانەوەی لە یەکێک لەو وڵاتانە و درێژەدان بە کاروباری سیاسی، بەڵام بەهۆی فشارەکانی تورکیا لەسەر وڵاتانی ئەوروپا، هیچ یەکێک لە وڵاتە ئەوروپییەکان ئامادەی داڵدەدانی ئۆجەلان نەبوون.
لەكۆتایی هاوینی ساڵی 1998دا «ئاتیلا ئاتەش» فەرماندەی هێزە زەمنییەكانی سوپای توركیا، لەشارۆچكەی رەیحانلی لەویلایەتی هاتای لەسەر سنووری توركیا - سوریا، لە گوتارێكی خۆیدا هێرشدەكاتە سەر حكومەتی سوریا‌و داڵدەدانی عەبدوڵڵا ئۆجەلان بەدوژمنایەتیكردنی وڵاتەكەی وەسفدەكات.
ئەم گوتارەی ئاتیلا ئاتەش دەمودەست لەلایەن نێوەندە سیاسیی، میدیایی‌و هەواڵگرییەكانەوە بەهەڕەشەی راستەوخۆی جەنگ لێكدەدرێتەوە. ناوبراو بۆ یەكەمجار بوو كە ئاوا ناوی سوریا بهێنێ‌و ئاماژەشی بەوە كردبوو كە ئەوان چیتر لەئاست ئەم دەستوەردانەی دیمەشقدا بێدەنگ نابن‌و بەپەلاماری سەربازیشەوە بۆ هەموو شتێك ئامادەن.
دواتر دەردەكەوێت، كە ناوبراو لەكۆبوونەوەی «دەزگای ئاسایشی نەتەوەیی»دا رادەسپێردرێت ئەم لێدوانە بدات، چونكە میت‌و دەزگا هەواڵگرییە تەریبەكان كۆمەڵێك بەڵگەنامە لەسەر پشتیوانیكردنی سوریا لەپەكەكە كۆدەكەنەوە‌و لەو كۆبوونەوەیە پیشانیدەدەن كە لەناویاندا دانپیانانی شەمدین ساقق فەرماندە رفێندراوەكەی پەكەكەش هەیە. بەتایبەت قسەكانی ساقق لەسەر جێ‌و شوێنی ئۆجەلان‌و جۆری هاوكارییەكانی سوریا بۆ پەكەكە بە بەڵگەی یەكلاكەرەوە لەقەڵەمدەدرێن.
دوابەدوای هەڕەشەكەی ئاتیلا ئاتەش، سولەیمان دەمیرەل سەرۆك كۆماری ئەوسای توركیاش لەگوتارێكی خۆیدا بەڵگەی بۆ ئەم دەستوەردانەی سوریا هێنایەوە‌و راگەیاند "ئەوان ئامادەگی تەواویان هەیە بۆ ئەوەی بەرپەرچی ئەم هەڵوێستەی دیمەشق بدەنەوە".
ئەوەندەی نەبرد مەسعود یڵماز سەرۆك وەزیرانیش بەپێی پرەنسیپ‌و رێساكانی نەتەوە یەكگرتووەكان، ئەم هەڵوێستەی سوریای لێكدایەوە‌و باسی ئەوەی كرد، كە توركیا مافی بەرگری لەخۆكردنی تەواوی هەیە‌و لەكۆبوونەوەی دەستەی وەزیرانی وڵاتەكەیدا بڕیارێكیان وەرگرت، كە لەئاست ئەم دەستدرێژییەی سوریا بۆ هەموو كاردانەوەیەك ئامادەباشی رابگەیەنن.
دواتر ناوبراو بەئەنقەست لەتەلئەبیبەوە بەزمانێكی وردتر هەڕەشەی لەسوریا كرد، كە ئەوان چیتر تەحەمولی سیاسەتەكانی ئەسەد ناكەن، ئەنكەرە داوا لەشام دەكات ئۆجەلانیان رادەست بكاتەوە، شام خۆی لەمە دەبوێرێت.
ئاپۆ، كە پێش شەش مانگ لەلایەن پەرلەمانتارەكانی یۆنانەوە بانگهێشتی فەرمی بۆ واژووكراوە، لەگەڵ چەند هاوڕێیەكی بەرەو ئاسینا بەڕێدەكەوێت، بەڵام لەفڕۆكەخانەی ئاسینادا بەرەورووی هەڵوێستێكی سەیر‌و سارددەبێـتەوەو یۆنانییەكان سۆز‌و بەڵێنەكانیان پشتگوێدەخەن‌و كەس پێشوازی لەناوبراو ناكات، تەنانەت رێگەیشی پێنادەن لەفڕۆكەخانەكە بێتە دەرەوە، دەزگای هەواڵگری ئەو وڵاتە لە فڕۆكەخانە چەندجارێك لەگەڵی كۆدەبنەوە، هەروەها بەراشكاوی پێی رادەگەیەنن ئەوان ناتوانن رێگەی پێبدەن لەوێ جێگیر ببێت، ئۆجەلان بەسەرڤیسی هەواڵگری رادەگەیەنێت، كە ئامادەیە بەناسنامەیەكی ساختەش لەو وڵاتە بژیت، بەڵام سەرڤیس بوار بەمەیش نادات، دوای ئەمە بەهەماهەنگی دەزگای هەواڵگریی‌‌و هەندێك لەبیرۆكراتەكان ڤیزەی روسیای بۆ دەستەبەردەكرێت، لەمۆسكۆش ماهیر وڵات كادری ناسراو‌و نوێنەری پەكەكە لەگەڵ روسەكان كۆدەبێتەوە‌و هەلێك دەڕەخسێنێ بۆ ئەوەی ئۆجەلان «تەنیا بۆ ماوەیەكی كاتی» لەو وڵاتە بمێنێتەوە!
سەرڤیسی هەواڵگری روسیا چەندین جار هەوڵی ئەوە دەدات، كە ئۆجەلان بخاتە ناو یارییەكی نەزانراوەوە، بەڵام ئەو بەمە قایل نابێت‌و ناتوانێت لەوە زیاتر فشارەكانی سەرڤیسی هەواڵگری روس قبوڵبكات، لەگەڵ ئەم دۆخەدا چەندین دەزگای هەواڵگری بەتایبەت میت، مۆساد‌و CIA دەست بەشوێنكەوتنی ئۆجەلان دەكەن.
سیا‌و میت بەهەماهەنگی بەردەوام لەرێگەی تەلەفۆنە ئاسمانییەكەیەوە قسەكانی ئۆجەلان تۆماردەكەن‌و لەگەڵ ئەمەیش پەیتا پەیتا حەشارگەكەی دەستنیشان دەكەن، لەروسیاش تێكڕای ئەو پەرلەمانتار‌و سیاسییانەی، كە پێشتر بەڵێنی هاوكاریان دابویە، لەبەڵێنەكانیان پاشگەزدەبنەوە‌و كەس خۆی لێ بەخاوەن ناكات، تەنیا ڤیلادیمیر ژیرنۆڤسكی پشتیوانی لێدەكات.
ئۆجەلانیش لەگەڵ سەرڤیسی هەواڵگری روس دەكەوێتە گفتوگۆ‌و ماهیر وڵات لەگەڵ ه. تایلان بەردەوام وادەكانی بۆ دیاریدەكەن، ئۆجەلان لەدیدارەكانیدا باس لەهاوكاری دولایەنە‌و ستراتیژی كورد روس دەكات‌و ئەمەیش بەخاڵی وەرگۆڕێنەری ناوچەكە وەسفدەكات، دواجار ژیرنۆڤسكی لەپیلانی سەرڤیسی هەواڵگری ئاگاداردەبێت‌و بەناچاری یەك هەفتەی تەواو ئاپۆ لەماڵەكەی خۆی لەمۆسكۆدا حەشار دەدات، ناوبراو دواتر ئاپۆ بۆ ماڵێكی ئەمانتر دەگوێزێتەوە.
دوای چەند رۆژێك بەرپرسیارانی دەوڵەت‌و بەتایبەت بەڕێوەبەرانی سەرڤیسی هەواڵگری لەهەمان ماڵ لەگەڵ ژیرنۆڤسكی كۆدەبنەوە، ئەو داوایان لێدەكات، كە مافی پەنابەری بەئۆجەلان بدەن، بەڵام ئەم بەرپرسییارانە بەراشكاوانە پێیڕادەگەیەنن، كە ئەو مافێكی وای نییە‌و پێویستە ئۆجەلان خاكی روسیا بەجێبهێڵێت، ئەوان لەكۆبوونەوەی ئەو رۆژەدا بەژیرنۆڤسكی رادەگەیەنن، كە مانەوەی ئۆجەلان بۆ بەرژەوەندی ئاسایشی نەتەوەیی روسیا مەترسی بەدواوە دەبێت، لەمە بەدوا هەندێك لەپەرلەمانتاران داوای مافی پەنابەری لەبیلۆروسیا دەكەن، سەبارەت بەم پرسە سەرۆكی بیلۆروسیا پێیان رادەگەیەنێت، كە وڵاتەكەی بەپێی بڕیارەكانی روسیا كاردەكات‌و ناتوانێت لێی لابدات، لەبەر ئەمەیش لێرەش وەڵامی رەت وەردەگرنەوە، لەم كاتەدا دیپلۆماتە توركەكان‌و جەمیس رۆبین وتەبێژی وەزارەتی دەرەوەی ئەمریكا بەتوندی لەئاست ئەم هەڵوێستەی روسیا دەوەستنەوە‌و رەخنەی دەكەن.
لەم ماوەیەدا ئۆجەلان لەگەڵ یەڤگینی پریماكۆڤ سەرۆك وەزیرانی روسیا كۆبوونەوەیەكی دووقۆڵی دەكەن‌و دیسان ئۆجەلان داوای پەنابەری لێدەكاتەوە‌و ئەویش سەرلەنوێ ئەمە رەتدەكاتەوە، ئیتر كار لەكار دەترازێ‌و ژیرنۆڤسكی‌‌و پەرلەمانتارەكانی هاوڕێی لەو ماڵەی بۆیان دیاریكردووە بەردەوام سەردانی ئاپۆ دەكەن‌و داوای لێدەكەن هەرچی زووترە روسیا بەجێ بهێڵێت‌و پێیشی دەڵێن روسیا نایەوێت پەیوەندییە ئابووری‌و سیاسییەكانی لەگەڵ خۆرئاوای لەبەر ناوبراو تێكبدات، دواتر لەبەڵگەنامەكاندا دەردەكەوێت، كە ژیرنۆڤسكی بەردەوام لەسەر دۆخی ئۆجەلان زانیاری بەمۆساد گەیاندووە.
ئەم پیاوە، كە بەبنەچە جووە، ئاپۆ دەخاتە ناو یارییەكی ترسناكەوە، یاوەرەكانی ئۆجەلان ئەمجارە لەگەڵ وڵاتی قوبرس دەكەونە گفتوگۆوە، ئۆجەلان پێشتر لەهەڵوێستی دوورووی یۆنانییەكان‌و بانگهێشتە درۆزنانەكانیان تێدەگات، بەئومێدێكی كەمەوە سەیری ئەم پلانە دەكات.
پلانی قوبرسیش لەبەر هۆكارە سیاسی‌و ئەمنییەكان پووچەڵدەبێتەوە، كاتێك نێوبژیوانە قوبرسییەكە لەگەڵ ماهیر وڵات پێیدەڵێت ئەگەری هەیە قوبرس پێشوازی لێبكات، ئەوسا ئۆجەلان بەیاوەرەكەی واتە ماهیر وڵات دەڵێ «فڕۆكەكە بەسەر ئاسمانی توركیادا دەچێتە قوبرس‌و لێرەیش ئەگەری ئەوە هەیە فڕۆكەكە بخرێتەخوارەوە، یاخود بەزۆرەكی بنیشێنرێتەوە، بۆیە باشترە لەمە پاشگەزببینەوە».
ئیتر مانەوەی ئۆجەلان لەروسیا دەكەوێتە مەترسی زیاترەوە، لێرەوە ئەوان لەوە دەترسن روسیا ئاپۆ بەتوركیا، یاخود ئەمریكا بسپێرێتەوە، روسەكان دواتر پێیدەڵێن «كێشەكانمان لەگەڵ قوبرس چارەسەركردووە‌و دەتوانی بڕۆیتە ئەو وڵاتە»، بەڵام ئاپۆ ئەمە بە ریسك دەزانێت‌و رەتیدەكاتەوە، دواتر «كانی یڵماز» ئەوسا نوێنەری پەكەكە لەئەوروپا دەبێت، بەنهێنی لەگەڵ سەرڤیسی هەواڵگری ئیتاڵیا كۆدەبێتەوە، ئیتاڵیا پێش چەند مانگێك خانەخوێتی خولی دووەمی پەرلەمانی كوردستان لەدەرەوەی وڵاتی كردووە‌و پێشوازی لەپەرلەمانتارە راكردووەكان دەكات، بەوە رازیدەبێت، كە ئۆجەلان بچێتە ئەو وڵاتەوە، ئۆجەلان دەستبەجێ دەڕواتە رۆما‌و لەوێ جێگیردەبێت، ئۆجەلان لەرێی كانییەوە داوا لەئیتاڵییەكان دەكات، كە مافی مانەوەی پێبدرێ‌و بەهیچ شێوەیەك بۆ هیچ شوێنێك رەوانە نەكرێتەوە، لێرە لەبەر پاسپۆرتە ساختەكەی پۆلیس هەندێك كێشەی بۆ دەنێتەوە، بەڵام تەنیا لەبەر میدیاكان ئەمە دەكەن‌و بەكانی یڵماز رادەگەیەنن، كە با تەحەمولی تۆزێك سەختگیری رواڵەتی بكەن‌و دواتر ئەمە دەرباز دەبێـت.
بەبیانووی نەخۆشییەوە ئاپۆ دەبرێتە نەخۆشخانەی «پالیسترینا»و لەوێ رادەگیرێت، كانی دیسان لەگەڵ ماسیمۆ دالێما سەرۆك وەزیرانی ئیتاڵیا كۆدەبێتەوە‌و داوایان لێدەكات فەزایەكی زیاتر بدەنە سەرۆكەكەی، دالێما پێی رادەگەیەنێت فشارەكان ئەوەندە زۆرن رۆما بەتەنیا ناتوانێت تەحەمولی بكات.
ئۆجەلان لەنەخۆشخانەكە بەباشی دەربازی دەكات‌و كەڵك لەدەرەتانە كۆمەڵایەتییەكان وەردەگرێت رۆژانە چاوی بەچەندین كەس دەكەوێت‌و لێدوان بەمیدیاكانیش دەدات، هەروەها دالێما هەفتەیەك جارێك سكرتێرەكەی خۆی بۆ لای دەنێرێت‌و گفتوگۆی تایبەتی لەگەڵ دەكات، هێشتا پێی ئۆجەلان لەرۆما گەرم دانایەت، توركیا قوشقی دەبێـت، لەتوركیا كاڵاكانی ئیتالیا پرۆتێست دەكرێـت، سیاسییەكان لێدوانی توند لەدژی رۆما دەدەن، ئیتاڵیا بەزۆرەكی وەڵامی رەت بەو خواستانە دەداتەوە، كە ئەنكەرە لەمەڕ رادەستكردنەوەی ئەو پیاوەی حومكی مەرگی لەسەرە، پێشكەشی كردووە، لەپاڵ پەرچەكردارە سیاسی‌و كۆمەڵایەتییەكان، كۆمپانیا ئیتاڵیاییەكان بۆ پاراستنی بەرژەوەندییەكانیان فشاردەخەنەسەر حكومەتی رۆما بۆ ئەوەی لەوە زیاتر زیان بەبەرژەوەندییەكانی وڵات نەگەیەنێت، بۆیە داوادەكەن رۆما ئۆجەلان لەوێ دەربكات، لەولاش بەرپرسیارە هەرە پایەبەرزەكانی ویلایەتە یەكگرتووەكانیش بەئاوازێكی توند هۆشداری بەئیتاڵیا دەدەن، ئەڵمانیا تاڕادەیەك پشتیوانی لەئیتاڵیا دەكات‌و واز لەداواكردنەوەی ئۆجەلان دەهێنێت‌و بەمەیش باری رۆما سوك دەكات، رۆمایش دەستبەجێ ئاپۆ لەماڵێكدا جێگیردەكات‌و بڕیاری دەستگیركردنی ناوبراو هەڵدەوەشێنێـتەوە.
رۆما‌و بەرلین پێكەوە كۆمیسیۆنێك پێكەوەدەنێن بۆ ئەوەی قەدەغەكان لەسەر ناوبراو لابەرن، بەڵام ئەم كارە لەنیوەدا پەكدەخرێت! كەسیش سەر لەهۆكارە پشتپەردەكانی دەرناهێنێت كە بۆچی پەكخراوە‌و وازی لێهێنراوە‌و كێ لەپشتی ئەمە بووە، دواجار حكومەتی رۆما كە لەوپەڕی تەنگەتاویدا دەبێت، داوا لەمۆسكۆ دەكات بەمەرجی سەربەستكردنی پێدانی قەرز‌و لابردنی مەرجە سەختەكان لەلایەن سندوقی دراوی نێونەتەوەیی IMF داوا لەو وڵاتە دەكات مافی پەنابەرێتی بەئۆجەلان بدات. لەو ماوەیەدا ئۆجەلان لەئیتاڵیا دەمایەوە، لەلایەن پۆلیسی ئەو وڵاتەوە بەباشی پارێزگاری لێدەكرا، رێك لەم ماوەیەدا ئەبوشەریف كە یەكێك لەكەسە نزیكەكانی یاسر عەرەفات سەرۆكی دەسەڵاتی نیشتیمانی فەڵەستینە، نامەیەك بۆ ئۆجەلان دەنوسێ‌و باسی ئەوە دەكات كە «حەزی لێیە یارمەتی بدات». لێرەوە دیسان بەنێوبژیوانی سەرڤیسی هەواڵگری ئیتاڵیا‌و سەرڤیسی هەواڵگری روسیا، چەندین كۆبوونەوە لەگەڵ یەك‌و لەگەڵ ئۆجەلان دەكەن. ئاخری سەرباری هۆشداری دەیان كەسایەتی كورد‌و غەیرەكورد كە داوای لێدەكەن ئیتاڵیا بەجێ نەهێڵێ، ئۆجەلان بەهاوكاری ئەحمەد یامانی هاوڕێی‌و دوو كچی كورد رۆما بەرەو مۆسكۆ بەجێدەهێڵێت، لەم كاتەدا ئۆجەلان بۆخۆی داوا لەكانی یڵماز دەكات كە بۆ بەشداریكردن لەكۆنگرەی شەشەمی پارتەكەی كە لەناوچەی خنێرەی كوردستانی عێراق بەنهێنی بەڕێوەدەبرێت، بگەڕێتەوە بۆ كوردستان. كانی لەمۆسكۆ دوای گفتوگۆكردن لەگەڵ ماهیر وڵات سەرەنجام بەفڕۆكە لەگەڵ هاوڕێیەكی خۆی (حەیدەر عەلی قەیتان) خۆی دەگەیەنێتە یەریڤان‌و لەوێشەوە بەسەر ئێراندا دەگاتە ورمێ‌و لەوێشەوە بەسەیارە لەناوچەی چۆمی گادەرەوە دەگاتە خنێرە‌و فریای كۆنگرەكە دەكەوێت، سەركردەكانی پەكەكە لەكۆنگرە بەگومانەوە لەهاتنەوەی كانی دەڕوانن!
ئەمجارە كاتێك ئۆجەلان دەگاتە مۆسكۆ، لەو وڵاتە پێیدەگوترێت، كە تەنیا سێ رۆژ بۆی هەیە بمێنێتەوە‌و دوای ئەوە دەبێ مۆسكۆ تەرك بكات، دواتر ناوی وڵاتێكی دیكە بەزەینیاندا دێت، كە ئەویش «ئەرمەنستان»ە‌و بڕیاردەدەن بچنە ئەوێ، لێرەوە فڕۆكەیەكی تایبەتی بەكرێدەگرن، بەڵام پێدەچێت كەسێك بەگوێی ئۆجەلانیدا دابێت، كە وڵاتێكی خۆرهەڵاتی ناوەڕاست باشترە، بۆیە لەمە پاشگەزدەبێـتەوە، هێشتا دیار نییە، كە ئەم فیكرەیە هی كام سەرڤیسی هەواڵگری بووە! دیسان فڕۆكەكە لەیەكەم وێستگەدا لەیۆنان دەنیشێتەوە، لێرەوە دەڕۆنە وڵاتێكی خۆرهەڵاتی ناوەڕاست! بەڵام تەنیا چەند سەعاتێك لەو وڵاتە دەمێننەوە‌و كەس نازانێ‌ت بەچی هۆیەك ئۆجەلان ئەو وڵاتە بەجێدەهێڵێت! ئیتر باسی هۆڵاندا دەكەوێتە سەرزمان‌و ناوبراو هاندەدرێت، كە بەرەو هۆڵاندا بچێت، كاتێك دەگەنە ئەمستردام، لەبەر ئەوەی رێكەوتنی شنگن لەنێوان ئەو وڵاتە‌و یونان هەیە، دەسبەجێ فەرمان بەفڕۆكەكە دەدەن، كە ئەوێ بەجێ بهێڵێت‌و دیسان دەیهێننەوە بۆ ئاسینا، ئێستا دەركەوتووە كە رێك لەو رۆژەدا CIA بەوەی زانیوە، كە ئۆجەلان دەیەوێ بڕواتە هۆڵاندا، بۆیە دەستبەجێ ئەو وڵاتە ئاگاداردەكەنەوە‌و ئەو وڵاتەیش ناهێڵێ ئۆجەلان پێ بنێتە سەر خاكەكەیان!
بەگوێرەی دواهەم بڕیار دەبوا ئۆجەلان سەرەتا بگاتە كینیا‌و لەوێشەوە بگەیەنرێتە ئەفریقای باشوور، لەكینیا ئۆجەلان لەماڵی سەفیری یۆنان دەمێنێتەوە، بەڵام دۆخەكە شپرزدەبێ‌تو رێك لەئاسیناوە فەرمان بە سەفیرەكە دەگات كە دەبێ دەستبەجێ ئۆجەلان لەماڵەكەی خۆی دەربكات.
سەرەتا سەفیر بیر لەوە دەكاتەوە چەند سەرسەرییەكی كینیایی بەكرێ بگرێ‌و ئۆجەلان بەزۆر لەماڵەكەی بكاتە دەرەوە! دوابەدوای ئەمە تیمێكی تایبەت دێت‌و چەند هەوڵدەدەن بچێتەدەرەوە، ئەنجامێكی وا وەرناگرن، ئیتر كارەكە تێكدەچێ‌‌و هەموو سەرڤیسە هەواڵگرییەكان بەم دۆخە دەزانن‌و هەواڵەكە دەگاتە ئەنكەرە‌و دەزانرێت ئۆجەلان لەكوێیە‌و دەستبەجێ كۆبوونەوەی باڵای بۆ دەبەستن، دەمودەست شاندێكی CIA بەپەلە دەگاتە ئەنكەرە‌و لەگەڵ سەرۆك كۆمار، سەرۆك وەزیران، راوێژكاری میت‌و فەرماندەیی گشتی هێزە چەكدارەكاندا كۆدەبێتەوە‌و پێیان رادەگەیەنێت، كە وڵاتەكەی ئامادەیە ئۆجەلانیان رادەستبكاتەوە، بەڵام ئەم شاندە بەچەند مەرجێك ئامادەیە ئەمە بكات.
مەرجەكانیش ئەمانە بوون: ئۆپەراسیۆنەكە بەهاوبەشی دەكرێت، بەزیندویی دەهێنرێتەوە بۆ توركیا، بەشێوەیەكی دادگەرانە دادگاییدەكرێت‌و نابێ لەسێدارە بدرێت.
ئەنكەرە ئەم مەرجانە قبوڵدەكات‌و ئۆپەراسیۆنەكە دەستپێدەكات، بەرپرسیارێكی باڵای یۆنانی راستەوخۆ لەگەڵ ئۆجەلان قسەدەكات‌و پێیدەڵێت، كە «فڕۆكەیەكی تایبەت‌و ئەمینی بۆ ئامادەكراوە‌و دەنێردرێتە وڵاتێكی ئەمینتر» پاشان دەردەكەوێت، كە ئەمە درۆ بووە‌و تەنیا فێڵێك بووە بۆ ئەوەی ئۆجەلان لەماڵی باڵیۆز بێتەدەرەوە.
سەرەنجام لە شەوی 14 لەسەر 15ی شوباتی 1999 لەڕێگەی فڕۆکەیەکی یۆنانیەوە لە ئەسینای پایتەختی یۆنانەوە بەڕێدەکەوێت بۆ ئەفریقا، ئەمەش دوای رێککەوتنی ئۆجەلان و حکومەتی یۆنان بوو کە ماوەیەک لە باڵیۆزخانەی ئەو وڵاتە لە نایرۆبی بمێنێتەوە و دواتر داوای مافی پەنابەرێتی سیاسی لە کینیا یان وڵاتانی دیکەی ئەفریقا بکات. ئەوەش لەکاتێکدا بوو کە دەزگای هەواڵگری تورکیا ناسراو بە میت، بەهاوکاری دەزگای هەواڵگری ئیسرائیل و ئەمریکا، رۆژانە چاودێری جموجۆڵەکانی ئۆجەلان و هاوڕێکانیان دەکرد لە وڵاتانی ئەوروپا، دوای گەیشتنیشی بە نایرۆبی، تیمەکانی دەزگای هەواڵگیری ئیسرائیل و تورکیا، توانیان گوێ لە گفتوگۆکانی نێوان ئۆجەلان و هاوڕێکانی بگرن. ئەو تیمە هەواڵگرییە پلانی دەستگیرکردنی ئۆجەلان لەنێو ئەو خانووە دادەڕێژن، دواتر دەستبەسەری دەکەن و رەوانەی تورکیای دەکەنەوە.
