بەرپرسێکی باڵای نەتەوە یەکگرتووەکان لە عێراق هۆشداریدا لەوەی شەڕی غەززە ببێتەهۆی ئەوەی عێراق ڕابکێشێتە ناو ململانێیەکی ناوچەییەوە، سەرەڕای هەوڵەکانی حکومەت بۆ ئەوەی لە ململانێکان دوور بکەوێتەوە.

 کوشتنی بەرپرسی مەکتەبی سیاسی حەماس، ئیسماعیل هەنیە، لە تاران، کوشتنی فوئاد شوکر، فەرماندەی سەربازیی حیزبوڵای لوبنان، لە بەیروت، هەروەها هێرشی بەندەری حودەیدە لە یەمەن، و بۆردومانکردنی بارەگاکانی چەکدارەکان لە جورف سەخر لە باکوری بابل ڕەوشی ڕۆژهەڵاتی ناوەڕاستی لە شەڕێکی گەورە نزیک کردوەتەوە.

 جێگری نوێنەری تایبەتی نەتەوە یەکگرتووەکان لە عێراق، کلۆدیۆ کۆردۆن، بەڕۆژنامەی زەناشناڵی ڕاگەیاندووە “سەرۆک وەزیرانی عێراق خوازیارە بەهۆی پشتیوانییەکەی لە ڕووی دیپلۆماسی و سیاسییەوە بۆ مافەکانی فەلەستینییەکان ڕانەکێشرێتە ناو ئەم شەڕەوە”.

هەروەها گوتیشی، “جەنگ ڕێگەیەک نییە بۆ چارەسەرکردنی کێشەکان و مەترسی ئەوە هەیە کە ڕەوشەکە خراپتر بێت .”

 جەختی لەوەش کردەوە کە "لە ئاستەنگییەکانی بەردەم عێراق تێدەگات، بەڵام داوا لە هەموو لایەک دەکەین کە پەرەسەندنەکان کەم بکەنەوە، لە هەمووی گرنگتر ئەم شەڕە ڕابگرن و کار بۆ چارەسەری سیاسی بکەن"، هیوای خۆی دەربڕی "کە ئەو هەڵچوونە چاوەڕوانکراوە ڕوونەدات".

کۆردۆن لەساڵوەگەڕی بیرەوەری هێرشە تیرۆریستییەکەی سەر بارەگای نەتەوە یەکگرتووەکان لە بەغدا لە ساڵی 2023، ئاماژەی بەوەکرد: دڵخۆشم و شانازی بەو کارانە دەکەم کە هاوکارەکانم کردوویانە لە ماوەی 21 ساڵی ڕابردوودا لەعێراق.

  ئەرکی فراوانی نوێنەرایەتیی نەتەوە یەکگرتووەکان لە سەرەتادا بۆ یارمەتیدانی پەرەپێدانی دامودەزگاکانی عێراق و پاڵپشتیکردنی گفتوگۆ و بەرەوپێشبردنی مافەکانی مرۆڤ دروستکرابوو، کۆردۆن ئاماژەی بەوەدا کە "ئەو ئەرکە ئێستا لەسەر داوای بەغدا سنووردار کراوەو وڵاتەکە پێشکەوتنی بەدەستهێناوە بەرەو سەقامگیری."

 لە دوای تەواوبوونی ئەرکی نوێنەری تایبەتی پێشووی نەتەوە یەکگرتووەکان لەعێراق، جینین هێنیس پلاسخارت، لە یەکی حوزەیران، کۆردۆن سەرپەرشتیاری کاروباری نوێنەرایەتییەکە دەکات تا هاتنی سەرۆکی نوێ محەمەد ئالحەسەنی کە چاوەڕوان دەکرێت ئەم ڕۆڵە بگرێتە ئەستۆ.

 ئاماژەی بەوەشکردووە، هەر نوێنەرێکی تایبەت کەسایەتی تایبەتی خۆی هەیە، بەڵام هەموومان لە چوارچێوەی ئەو ئەرکەدا کاردەکەین کە ئەنجومەنی ئاسایش پێی بەخشیوین، و بەوپەڕی خۆشحاڵییەوە چاوەڕێی ئەوە دەکەین سەرۆکی نوێ بگات.


 کۆردۆن پێی وایە عێراق وڵاتێکی سیاسی زیندووە، کە زۆر لایەن حوکمڕانی دەکەن، ئەویشی بە دیموکراسی وەسف کرد و ئاماژەی بەوەدا “ڕەنگە ژیرانەتر بێت بەدوای سازاندا بگەڕێین لەبری دووبەرەکی، بەڵام دیسانەوە، خەڵک ئازادن لە بەدواداچوونی ئەجێندا سیاسییەکانی خۆیان، و تا ئەو کاتەی کە بە شێوەیەکی ئاشتیانە و لە چوارچێوەی دامەزراوەییەوە ئەنجام بدرێت، ئەوە شتێکی باشە.”

 بەگوتەی کۆردۆن، نەتەوە یەکگرتووەکان دوا خولی هەڵبژاردنەکانی ساڵی 2021 بە باوەڕپێکراو دەزانێت، هەروەها متمانەی خۆی دەربڕی کە خولی داهاتوو لە ساڵی 2025 بە هەمان شێوە سەرکەوتوو دەبێت و، هیچ هۆکارێکیش نییە بۆ ئەوەی کە عێراق نەتوانێت هەڵبژاردنی پەرلەمانی کوردستان بەڕێوەببات.

 لە مانگی شوباتی ڕابردووەوە ئۆپەراسیۆنەکانی چەکدارەکان لە دژی هێزەکانی ئەمریکا وەستاون، ئەمەش لە چوارچێوەی ئاگربەستێک کە ڕاگەیەندرابوو.

 ئەم ئاگربەستە دواتر لەگەڵ پەرەسەندنی ململانێی میحوەری خۆڕاگری و ئیسرائیل شکێندرا، بۆیە مەترسی دووبارە سەرهەڵدانەوەی گرژییەکان هەیە، ئەوەش وایکردووە نەتەوە یەکگرتووەکان هۆشداری لەئەگەری تێوەگلانی عێراق لە ململانێکانی ناوچەکە بدات.